اپنے دوست کو خط لکھئے جس میں سادہ زندگی گزارنے کی اہمیت بیان کریں

 دوست کو خط لکھئے جس میں سادہ زندگی گزارنے کی اہمیت بیان کری  

کمرہ امتحان

کراچی

۵۱ مارچ ۰۰۰۲ئ

میرے پیارے دوست،

اسلام وعلیکم

میرے عزیز یہ کیا تم ہر خط میں لکھتے ہو کہ فلاں نے کار خریدلی، فلاں دوست دوبئی چلا گیا ہے۔ فلاں شخص نے بنگلہ بنالیا ہے۔ فلاں رشتہ دار نے ٹی وی ڈش اور وی سی آر لے لیا ہے۔ فلاں یہ کررہا ہے اور فلاں وہ کررہا ہے۔ شاید تمہیں علم ہی نہیں بہترین زندگی گزارنے کا اصول یہ ہے کہ علمی اور دینی معاملات میں اپنے سے اونچے اور اعلی درجے والوں کی پیروی کرنا چاہئے اور دنیاوی معاملات میں ہمیشہ اپنی حیثیت سے کم والوں پر نظر رکھنا چاہئے اور اللہ تعالی کا شکر ادا کرنا چاہئے کہ اس نے تمہیں لاکھوں سے بہتر بنایا۔ سادہ اور قناعت پسند زندگی ہی میں چین و سکون اور آرام ہے۔ انسان کی عزت مال و دولت ہی سے نہیں، اچھی سیرت و کردار سے بھی ہوتی ہے۔ انسان کو اپنی چادر دیکھ کر ہی پاوں پھیلانا چاہئے۔ ہمارے پیارے رسول حضرت محمد صلی اللہ علیہ وسلم اور صحابہ کرام رضہ کی سادہ اور کامیاب ترین زندگیوں کے نمونے ہمارے سامنے ہیں۔ اسلام نے کبھی اچھے کھانے پینے، پہننے اوڑھنے اور رہنے سہنے کی مخالفت نہیں کی۔ ہاں سادگی اپنانے اور فضول خرچی نہ کرنے کی تلقین کی ہے۔

ہم نے نام و نمود اور سستی شہرت حاصل کرنے کے لئے شادی بیاہ، تہواروں ، تقریبات اور دیگر فضول رسموں پر جو بے حدو حساب خرچ کرنا شروع کردیا ہے۔ یہ تباہی کا راستہ ہے ۔ اب تو عالم یہ ہوگیا ہے کہ مرنے والے کی ویڈیو فلم تک بنانے کا رواج چل نکلا ہے۔ اس کا سوئم اور چالیسواں اس طرح دھوم دھام سے کیا جاتا ہے کہ گویا خوشی کی تقریب کا اہتمام کیا ہو۔ بے عقل اور تقلید پسند لوگوں کی تعداد روز بروز بڑھ رہی ہے۔ وہ وسائل نہ ہونے کے باوجود ادھار قرض لے کر سب کچھ کرتے ہیں۔ ان ہی حرکات کی وجہ سے معاشرے میں حلا ل و حرام اور جائز و ناجائز کا فرق مٹتا جارہا ہے۔

ہم مسلمان ہیں ہمیں حضور اکرم صلی اللہ علیہ وسلم اور صحابہ کرام رضہ اور اپنے اسلاف کے طریقوں کو مشعلِ راہ بنانا چاہئے۔ سادہ زندگی گزارنے والے کبھی دوسروں کے محتاج نہیں ہوتے۔ ان کے بہترین کردار ، سیرت، غیرت اور خودداری کی وجہ سے اللہ بھی خوش ہوتا ہے اور لوگ بھی۔

فقط

تمہارا دوست

ا - ب -ج